...ЗВЫЧАЙНЫМ ВОКАМ
Фотанарысы вандровак па незвычайнаму Заслаўю, зробленыя звычайнымі заслаўцамі
Ч. І. Кальвінскі збор вачыма Таццяны Ласкі
Для ўсіх заслаўцоў дый бадай і для ўсіх мінакоў-турыстаў старадаўняе мястэчка Заслаўе — гэта сцяжыны-вандроўкі па маршрутах, адзначаных на ўсіх турыстычных мапах, гайдах ды даведніках: Валы, Кальвінскі збор, Рынкавая плошча, касцёл Найсвяцейшай Панны Марыі, Замачак, экспазіцыя “Кузня” ды этнаграфічны комплекс “Млын”…
Вядома, ёсць і непараднае нетурыстычнае Заслаўе… Газаправод, местачковыя прамзоны, сельскія Дзехнаўка ды Кладачкі, дый самі вакольныя вёсачкі, што прыляпіліся да мястэчка бы крылы-флігеля…
Але ўсё адно, усе вяртаюцца да тых пунктаў, з якіх пачалося Заслаўе і адкуль дагэтуль вее гісторыяй, тут яны вандруюць па тых сцяжынках памяці, блукаюць…
Там адпачываюць ды там жаж і весяляцца-гуляюць. Там робяць сэлфі і фотазамлёўкі, якія пазней выкладаюць у сацыяльныя сеткі, дасылаюць адно аднаму на пошту, публікуюць на сайтах… Цяпер тое заліваюць на сваіх старонках у сеціве, а раней — яшчэ за аналагавымі часамі, — фатаграфіі друкавалі ды падклейвалі ў фотаальбомы. Такіх фота — з тымі ж самымі краявідамі, — багата ў сямейных зборах не толькі заслаўцоў. Усе госці мястэчка, што мелі фотаапараты, пакідалі сабе на памяць іх…
Заслаўская мастачка і фатографка Таццяна Ласка — адна з закаханых у нашае мястэчка. Нарадзілася ў далёкай вёсцы Карповічы з-пад Глуску, што на Магілёўшчыне, але шмат гадоў ужо жыве тут. Жыве ў любові да места. І часта яна фіксуе яго краявіды ў сваіх фотазамалёўках. І адное з улюбёных ёй месцаў фотанарысаў — гэта Валы з Кальвінскім зборам.
Прапаноўваем Вам глянуць на заслаўскае незвычайнае хараство вокам саміх заслаўцоў, вокам пані Таццяны — перад усім звычайнай заслаўскай местачкоўкі.
Таццяна Ласка
Нарадзілася ў 1959.
З 1982 займаецца фатаграфіяй — скончыла факультэт грамадскіх прафесій Беларускага політэхнічнага інстытута па спецыяльнасці фотакарэспандэнт.
Працуе ў тэхніцы акварэлі, пастэлі, мастацкага тэкстылю, творчай фатаграфіі.
Сябра Беларускага саюза мастакоў.
Удзельніца міжнародных, рэспубліканскіх выстаў і пленэраў.
Персанальныя выставы:
2002 — Архітэктурны комплекс XVI – XVIII стагоддзяў у Гальшанах, філіял Нацыянальнага мастацкага музея (а.г. Гальшаны, Ашмянскі р-н, Гродзенская вобл.).
2003 — Бібліятэка імя Л. Талстога (г. Мінск).
2006, 2007 — галерэя “Добрыя Мыслі” (г. Мінск).
2015 — Гісторыка-культурны музей-запаведнік “Заслаўe”